ACF-in baş katibi yeni geyim dəstlərini yeniyetmə cüdoçulara təqdim edib

Yeniyetmə cüdoçulara yeni idman geyimləri təqdim olunub. Allsport.az saytı xəbər verir ki, avqustun 17-dən 19-dək Latviya paytaxtı Riqada yeniyetmələrin Avropa birinciliyi keçiriləcək. Bu mötəbər yarışda Azərbaycan 10-u oğlan və 4-ü qız idmançı ilə təmsil olunacaq.

Bu gün ACF-də qitə birinciliyində ölkəmizin idman şərəfini qoruyacaq milli komandanın üzvləri ilə görüş keçirilib. Tədbirdə baş katib Elmar Babanlı koronavirus pandemiyası başladığı dövrdən indiyədək müəyyən çətinliklərə baxmayaraq, keçirilən məşqlərdən, cüdoçularımızın müxtəlif yarışlarda daim iştirak etməsindən, qazanılan uğurlardan söhbət açıb və həmin yarışlardan qarşılıqlı təhlillər aparılıb.

O, həmçinin milli üzvlərinin bu nüfuzlu yarışa hazırlıq məqsədi ilə keçdiyi təlim-məşq toplanışlarından və federasiyanın daim göstərdiyi qayğıdan bəhs edib. Baş katib sonda Azərbaycan cüdo federasiyasının rəhbərliyi adından idmançılarımıza qarşıdan gələn yarışlarda uğurlar diləyib. Görüş zamanı milli komandamızın yeni məşq və idman geyim dəstləri cüdoçularımıza nümayiş etdirilib.

Sonra məşqçi, idmançı və texniki heyətə yeni idman geyimləri təqdim olunub. Məşqçilər və idmançılar yeniyetmələri daim diqqət mərkəzində saxladığına və göstərdiyi qayğıya görə federasiya rəhbərliyinə minnətdarlıqlarını bildiriblər.