ACF media və ictimaiyyətlə əlaqələr üzrə təlimlər keçirir

ACF millinin məşqçi, hakim, idmançı və tibbi heyəti, federasiyanın əməkdaşları üçün KİV-lə ünsiyyət, ictimaiyyətlə əlaqələr üzrə təlimlərin təşkilinə başlayıb. Allsport.az saytı xəbər verir ki, layihə çərçivəsində ilk qrup kimi məşqçilər və tibbi heyətə seminar keçirilib.

Kommunikasiya ekspertləri Vüqar Baba və Emin Hüseynzadə media, jurnalistika, xəbər anlayışları, jurnalistlərin iş prinsipləri, idman mediasının xüsusiyyətləri barədə təlim keçiblər.

Mütəxəssislər cüdo nümayəndələrinə jurnalistlərlə ünsiyyət formasını, müsahibə vermək qaydalarını öyrədiblər. Cüdo nümayəndələrinin KİV-lə ünsiyyəti zamanı baş vermiş çətinliklərlə bağlı fikir mübadiləsi aparılıb, real hadisələr üzərindən tövsiyələr verilib.

Eyni təlimlər federasiya əməkdaşları və millinin digər üzvləri üçün keçiriləcək.