Avropa komanda çempionatına yollanacaq şahmatçılarımız bəlli oldu

Şahmatçıların Avropa komanda çempionatında Azərbaycan millisinin heyəti məlum olub. Allsport.az saytı xəbər verir ki, İslandiya paytaxtı Reykyavikdə keçiriləcək yarışda Azərbaycanın kişilərdən ibarət yığmasını Teymur Rəcəbov (2738), Şəhriyar Məmmədyarov (2736), Arkadi Naydiç (2682), Rauf Məmmədov, Eltac Səfərli (hər ikisi – 2627) təmsil edəcəklər. Komandanın kapitanı Murad İsgəndərlidir.

Qadın şahmatçılardan ibarət seçməmizin heyətinə Zeynəb Məmmədyarova, Ülviyyə Fətəliyeva, Gülnar Məmmədova, Xəyalə Abdulla və Nərmin Kazimova daxildirlər. Komandanın kapitanı Fikrət Sideifzadədir.

Azərbaycan kişi qrossmeysterlərinin əsas rəqibləri Rusiya, İngiltərə, Ukrayna, Fransa, Macarıstan və Ermənistan komandalarıdır. Xatırladaq ki, millimiz 2009-cu və 2013-cu illərdə bu yarışın qalibi olub.