Azərbaycan millisi ilk hazırlığını Qəbələdə keçəcək

Bakı Şahmat Olimpiadasında iştirak edəcək Azərbaycan millisinin üzvləri və məşqçilərlə görüş keçirilib. Allsport.az saytı xəbər verir ki, toplantıda hazırlıq proqramı müzakirə edilib və şahmatçıların fikirləri öyrənilib.
İclasda iştirak edən Azərbaycan Şahmat Federasiyasının vitse-prezidenti, Bakı Şahmat Olimpiadası Əməliyyat Komitəsinin direktoru Mahir Məmmədov şahmatçıların hazırlığı üçün lazımi şəraitin yaradılacağını söyləyib.

O, mötəbər yarışda ölkəmizi təmsil edəcək bütün komandalar üçün təlim-məşq planının hazırlandığını bildirib. Azərbaycan Şahmat Federasiyasının vitse-prezidenti vurğulayıb ki, Ümumdünya Şahmat Olimpiadasında kişi şahmatçılardan ibarət Azərbaycan yığmasına böyük ümid bəslənilir. Buna görə də şahmatçıların olimpiadaya yüksək səviyyədə hazırlaşması üçün proqram tərtib edilib.

Azərbaycanın əsas yığma komandası Bakı Şahmat Olimpiadasına qədər 3 təlim-məşq toplanışında iştirak edəcək. Hazırlığın ilk mərhələsi Qəbələdə baş tutacaq.

Yığıncaqda, həmçinin əsas yığma komandanın yoldaşlıq görüşü keçirməsi üçün Bakıya xarici komandaların dəvət olunması müzakirə edilib. Xatırladaq ki, Azərbaycan təşkilatçı ölkə kimi Bakı Şahmat Olimpiadasında 3 kişi və 3 qadın yığmasıyla təmsil olunacaq.