Bakıdakı turnirin açılış mərasimi keçirildi

Avropa Stolüstü Tennis Birliyinin prezidenti Ronald Kramerin başçılıq etdiyi nümayəndə heyəti fevralın 6-da Fəxri xiyabanı ziyarət edib. Allsport.az xəbər verir ki, nümayəndə heyətinin üzvləri müasir müstəqil Azərbaycan dövlətinin memarı və qurucusu, xalqımızın ümummilli lideri Heydər Əliyevin xatirəsini ehtiramla yad edib, məzarı önünə əklil və güllər düzüblər. Görkəmli oftalmoloq alim, akademik Zərifə xanım Əliyevanın da xatirəsi yad olunub, məzarı üstünə gül dəstələri düzülüb. Sonra Şəhidlər xiyabanına gələn qonaqlar Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini anaraq, “Əbədi məşəl” abidəsinin önünə əklil qoyublar. Bakının ən hündür nöqtəsindən Azərbaycan paytaxtının mənzərəsini seyr edən qonaqlara Şəhidlər xiyabanının tarixi və şəhərimizdə görülən abadlıq-quruculuq işləri barədə məlumat verilib.

Bu gün həmçinin “Top-16” kuboku yarışlarının rəsmi açılış mərasimi olub. Əvvəlcə yarışda mübarizə aparan komandalar meydana dəvət olunublar. Sonra Azərbaycan Respublikasının dövlət himni səsləndirilib. Açılış mərasimində Azərbaycan Stolüstü Tennis Federasiyasının prezidenti Şahin Mustafayev, gənclər və idman naziri Azad Rəhimov, Avropa Stolüstü Tennis Birliyinin prezidenti Ronald Kramer iştirak ediblər.

Mərasimdə çıxış edən nazir Azad Rəhimov Azərbaycanın son illərdə dünyada mühüm idman ölkəsi kimi tanındığını, respublikamızın mötəbər beynəlxalq idman yarışlarına uğurla ev sahibliyi etdiyini bildirib. O, dünyanın və Avropanın mötəbər idman qurumlarının nüfuzlu beynəlxalq turnirlərin keçirilməsini həvəslə Azərbaycana həvalə etdiklərini vurğulayaraq, bu baxımdan Prezident İlham Əliyevin ölkəmizdə idmanın inkişafına göstərdiyi diqqət və qayğının mühüm rol oynadığını diqqətə çatdırıb. Nazir bu yarışın ölkəmizdə keçirilməsi ilə bağlı göstərdikləri etimada görə Beynəlxalq Stolüstü Tennis Federasiyasına Avropa Stolüstü Tennis Birliyinə minnətdarlığını bildirib.

Avropa Stolüstü Tennis Birliyinin prezidenti Ronald Kramer Avropa “Top–16” kuboku yarışının Azərbaycanda keçirilməsinin mühüm idman hadisə kimi qiymətləndirib. O, turnirin yüksək səviyyədə təşkil olunmasına görə ölkəmizə minnətdarlığını bildirib. Azərbaycan Stolüstü Tennis Federasiyasının prezidenti Şahin Mustafayev mötəbər yarışın açılışı münasibətilə təbriklərini çatdırıb. Mustafayev son illərdə bütün sahələrdə sürətlə inkişaf edən Azərbaycanın dünyada idman ölkəsi və Olimpiya hərəkatının fəal iştirakçısı kimi tanındığını diqqətə çatdırıb. O, idmanın inkişafının Azərbaycan Prezidentinin həyata keçirdiyi siyasətin prioritet istiqamətini təşkil etdiyini, bu sahədə mühüm tədbirlərin görüldüyünü bildirib.

Mustafayev idmançılarımızın mühüm beynəlxalq yarışlarda və Olimpiya Oyunlarında böyük uğurlar qazanmalarını bunun bariz nümunəsi kimi qiymətləndirib. Azərbaycanın mühüm beynəlxalq yarışlara uğurla ev sahibliyi etdiyini deyən Federasiya prezidenti ölkəmizdə bu il birinci Avropa, 2017-ci ildə IV İslam Həmrəyliyi oyunlarının keçiriləcəyini bildirib. Azərbaycanda stolüstü tennis idmanının inkişaf tarixi barədə məlumat verən Mustafayev deyib ki, ölkəmizdə ilk dəfə təşkil olunan “Top-16” kuboku uğrunda yarışda Avropanın ən güclü 16 kişi və 16 qadın idmançısı mübarizə aparır. O, yarışda Azərbaycanın iki tennisçisinin – Fərhad İsmayılovun və Məryəm İmanovanın da iştirak etdiklərini diqqətə çatdırıb.

Avropa “Top-16” turnirinin ölkəmizdə stolüstü tennis üzrə ən mötəbər yarış olduğunu qeyd edən nazir tədbirin təşkilatçılığına görə təşəkkürünü bildirib, idmançılara uğurlar arzulayıb. Sonra üçqat Avropa çempionu, 1984-cü ildə mütləq Avropa çempionu xanım Valentina Popova çıxış edərək qitənin ən güclü stolüstü tennisçilərinin Bakıda bir araya gəlmələrindən sonsuz məmnunluq hissi keçirdiyini bildirib. İdman karyerasına Bakıda başladığını bildirən Popova Azərbaycanın idmanın bu növündə də zəngin ənənələrə malik olduğunu qeyd edib. O, bu yarışın ölkəmizdə stolüstü tennisin inkişafına təkan verəcəyinə əminliyini bildirib. Sonra Şahin Mustafayev turniri açıq elan edib. Açılış mərasimi konsert proqramı ilə başa çatıb.

Fevralın 8-dək davam edəcək turnirdə Avropanın 17 ölkəsindən 34 idmançı mübarizə aparır.