“Bu, matçın həlledici məqamı oldu”

“Nyukasl”ın baş məşqçisi Eddi Hau çempionlar liqasının pley-off mərhələsinin ilk oyunu çərçivəsində “Qarabağ” üzərində qazanılan qələbəni (6:1) şərh edib.

Allsport.az xəbər verir ki, mütəxəssis ikinci hissədə oyunun xarakterinin dəyişdiyini vurğulayıb: “İkinci hissədə tempimizi qorumaq istəyirdik, lakin oyun fərqli məcraya yönəldi. Rəqib müdafiəyə çəkildi və hücum qurmağımızı çətinləşdirdi. Uyğunlaşmaq üçün bir qədər vaxt lazım gəldi, lakin sona yaxın yenidən yaxşı oyun nümayiş etdirdik. Ümumilikdə hər şey bizim üçün əla keçdi”.

E.Hau qarşılaşmanın ən yaxşı oyunçusu seçilən Entoni Qordonun performansını xüsusi qeyd edib: “Entoni ilk hissədə çox yaxşı idi. O, topa qarşı düzgün oyun nümayiş etdirdiyi üçün çoxlu qol vurdu. Onun ilk qolundan çox razı qaldım, çünki bu, matçın həlledici məqamı oldu”.

Komandalar arasında cavab qarşılaşması fevralın 24-də Nyukasldakı “Sent-Ceyms Park” stadionunda keçiriləcək. Oyun Bakı vaxtı ilə saat 00:00-da başlayacaq.