Fabiano Karuana: Ev sahibi Azərbaycan millisinin təcrübəli şahmatçıları var

ABŞ millisinin lideri Fabiano Karuana Bakı Şahmat Olimpiadasının mətbuat xidmətinə açıqlama verib. Allsport.az saytı xəbər verir ki, qrossmeyster “dördillik”də rəqibləri belə dəyərləndirib: “Şahmat olimpiadasında zəif rəqiblər olmur. Daha doğrusu püşk güclüləri bir-birinə rəqib edir. Kifayət qədər iddialı komandalar olacaq.

Rusiya, Ukrayna, Çin yığmalarını xüsusi qeyd etmək istərdim. Ev sahibi Azərbaycan millisinin təcrübəli şahmatçıları var. Onlar doğma şəhərdə medallar uğrunda yarışacaq. İlk turdan sona qədər oyun nizamını qoruyan komandalar mükafatçılar sırasında yer alacaq.

ABŞ millisinin heyəti yaxşı şahmatçılardan formalaşıb. Biz də istərdik ki, Bakı Şahmat Olimpiadasında yaxşı nəticə qazanaq. Bunun üçün mümkün qədər səhvə yol verməmək lazımdır. Reqlament yığmaları diqqətli olmağa məcbur edir. Bir turda uğursuzluq olarsa komandanın mövqeyinə ciddi şəkildə təsir edir”.