Gənc cüdo hakimlərinə dərəcə kitabçaları verildi

Bakı şəhər gənclər və idman baş idarəsində Azərbaycan cüdo federasiyasının 7 nəfər referisinə 1-ci dərəcəli hakim kitabçaları təqdim olunub.

Allsport.az xəbər verir ki, tədbirdə Bakı şəhər gənclər və idman baş idarəsinin rəisi Raqif Abbasov çıxış edərək Azərbaycanda idman sahəsində uğurla həyata keçirilən dövlət siyasətindən, əldə olunan müvəffəqiyyətlərdən, cüdo idman növünün hərtərəfli inkişaf etməsindən danışıb: “Bakı şəhər gənclər və idman baş idarəsi ilə Azərbaycan cüdo federasiyasının müştərək təşkil etdiyi müxtəlif yaş qrupları arasında paytaxt birincilikləri, Həzi Aslanovun xatirəsinə ənənəvi beynəlxalq turnir ildən ilə iştirakçıların sayında kütləviliyin artımı ilə müşahidə olunur ki, bu da cüdo idman növünə ölkəmizdə böyük marağın olmasından xəbər verir”.

Daha sonra Azərbaycan cüdo federasiyasının baş katibi Elmar Babanlı və hakimlər komitəsinin sədri Mətin Rəhimli çıxış edərək respublika və beynəlxalq miqyaslı yarışlarda təşkilati və mənəvi dəstəyə görə baş idarəyə təşəkkürünü bildiriblər. Gənc hakimlərə gələcək karyeralarında uğurlar arzulayaraq onların arasında irəlidəki illərdə beynəlxalq dərəcə alaraq ölkəni olimpiadada, qitə və dünya çempionatlarında təmsil edəcək istedadlı referilərin olacağına inamını ifadə ediblər.

Sonda Azərbaycan cüdo federasiyasının qabaqcıl gənc hakimlərinə 1-ci dərəcə kitabçaları təqdim olunub.