İlin ilk şahmat yarışına start verildi

Azərbaycan şahmat federasiyası və gənclər və idman nazirliyinin təşkilatçılığıyla yanvarın 6-da şahmat üzrə I dəstə yarışlarına start verilib.
Allsport.az xəbər verir ki, açılış mərasimində çıxış edən federasiyanın I vitse-prezidenti Faiq Həsənov ilk dəfə olaraq bütün partiyaların internet üzərində canlı təqdim olunduğunu söyləyib. AŞF rəsmisi yekunda ən yüksək nəticə göstərəcək şahmatçıların Azərbaycan çempionatında mübarizə aparacağını bildirib.
Respublika şahmat mərkəzində təşkil edilən kişi və qadınlar arasında I dəstə yarışları ölkə çempionatına seçmə xarakter daşıyır. Birinci dəstədə kişilər arasında ilk 5 yer, qadınlar arasında isə ilk 2 yer Azərbaycan çempionatına vəsiqə qazanacaq.
Yarışın ümumi mükafat fondu 10 min manat təşkil edir. Kişilərin və qadınların yarışında birinci yerin sahibləri müvafiq olaraq 2500 və 1200 manat mükafat qazanacaq.
I dəstə yarışlarına yanvarın 14-də yekun vurulacaq. Turnirin baş hakimi Lütfiyar Rüstəmovdur.