“İlk dəfə belə yüksək səviyyəli yarışda iştirak etmək mənim üçün çox çətindir”

Vüqar Həşimovun xatirəsinə həsr olunan ShamkirChess-2015 superturnirində 5-ci turun görüşləri davam edir. Allsport.az saytı xəbər verir ki, Synergy Group-un təşkilatçılığıyla keçirilən yarışın 5-ci turunda azərbaycanlı şahmatçı Rauf Məmmədov Maykl Adamsla (İngiltərə) heç-heçə oynayıb. Həmyerlimiz mətbuat konfransında jurnalistlərin suallarına cavab verib:

“Ötən tur məğlub oldum. Məğlubiyyətdən sonra heç-heçə oynamaq yaxşıdır. Maykl Adams çox təcrübəli şahmatçıdır. Uşaqlıqdan onun pərəstişkarı olmuşam, partiyalarına dəfələrlə baxmışam. İstəyirdim, öz oyunumu diqtə edim, lakin alınmadı.

İlk dəfə belə yüksək səviyyəli yarışda iştirak etmək mənim üçün çox çətindir. Qələbə qazanmaq asan olmur. Zəif rəqib olmadığı yarışda dünyanın ən güclüləri oynayır. İl ərzində belə yarışlarda bir-iki dəfə iştirak etsəm böyük təcrübə qazanaram”.