Karuana: “So geri çəkilmirdi”

Vüqar Həşimovun xatirəsinə həsr olunan Shamkir Chess 2015 turnirində 7-ci turun görüşləri başa çatıb. Allsport.az xəbər verir ki, hesabat turunda İtaliya şahmatçısı Fabiano Karuana əslən Fillipindən olan Uesli Soya qalib gəlib. Partiyadan sonra hər iki şahmatçı partiya haqda fikirlərini bildirib.

Fabiano Karuana (İtaliya): “Qələbə qazanmaq hər zaman yaxşı hisslər yaradır. Debütdən istədiyim oyunu göstərməyə başladım. Maraqlıdır ki, So geri çəkilmirdi. Sona yaxın məğlubiyyətdən xilas olmağa çalışsa da, buna imkan vermədim. Qələbə xalımı 4-ə çatdırdı. Turnirdə qalib olmağa şansım çox deyil. Bununla belə son turlarda qələbə qazanmağa çalışacağam”.

Uesli So (ABŞ): “Son iki turda özümə bənzəmirəm. Oyun alınmır. Hazırlıq baxımından problem yoxdur. Sadəcə, oyun zamanı üstünlük qazana bilmirəm. Digər tərəfdən rəqiblər daha yaxşı oyun göstərir. Şəmkirdə heyət çox güclüdür. Hər tur ciddi mübarizə gedir. Fikrimcə, son turlar daha maraqlı olacaq”.