Məmmədyarovla Məmmədov ilk turda heç-heçəyə razılaşdı

Tanınmış Azərbaycan şahmatçısı, beynəlxalq qrossmeyster, mərhum Vüqar Həşimovun xatirəsinə həsr olunan “Shamkir Chess 2015” turnirində birinci tura yekun vurulub. Allsport.az xəbər verir ki, birinci turun ilk qarşılaşmasında hindistanlı sabiq dünya çempionu Vişvanatan Anand turnirin ötənilki qalibi, hazırki dünya çempionu Maqnus Karlsen ilə sülh bağlayıb.

Bu turda Azərbaycanın hər iki şahmatçısı da görüşlərini heç-heçə ilə başa vurub. Rauf Məmmədov fransalı Maksim Vaşye-Laqrav, Şəhriyar Məmmədyarov isə İtaliya şahmatçısı Fabiano Karuana ilə heç-heçə edib.

Turun digər görüşlərində Vladimir Kramnik (Rusiya) Maykl Adams (İngiltərə), Uesli Sou (ABŞ) isə Aniş Giri (Niderland) üzərində qələbə qazanıb.