Belarus və Macarıstana qarşı

Mingəçevir “Kür” Olimpiya tədris-idman mərkəzində təlim-məşq toplanışını başa vuran qadın voleybolçulardan ibarət millimiz Bakıya qayıdıb. Allsport.az xəbər verir ki, yığma Avropa çempionatına hazırlıqları iyulun 26-dək kimi paytaxtda davam etdirəcək.

Bakıdakı hazırlığın gedişində ölkəmizdə toplanış keçəcək Belarus və Macarıstan komandaları ilə bir neçə yoldaşlıq görüşü də nəzərdə tutulub.

Avqustun 18-dən sentyabrın 4-dək olacaq Avropa çempionatının final mərhələsində 24 komanda 4 qrupda mübarizə aparacaq. Oyunlara 4 ölkə – Bolqarıstan, Rumıniya, Serbiya və Xorvatiya ev sahibliyi edəcək. “A” qrupunda mübarizə aparacaq millimizin rəqibləri ev sahibi Serbiya ilə yanaşı, Belçika, Rusiya, Fransa və Bosniya və Hersoqovina yığmaları olacaq.

Görüşlər Belqradda gerçəkləşəcək.