Sərbəst güləşçilərimizin Kislovodsk toplanışı davam edir

Xəbər verdiyimiz kimi, sərbəst güləş yığmamız Kislovodskda təlim-məşq toplanışı keçir. Allsport.az saytı xəbər verir ki, Romada keçirilən Avropa çempionatından dərhal sonra qonşu ölkədə hazırlığa başlayan millidə olimpiya çəkilərində çıxış edən güləşçilər yer alıb.

AGF-in vitse-prezidenti Firdovsi Umudov, baş məşqçi əvəzi Zəlimxan Hüseynov və məşqçi Arif Abdullayevin rəhbərliyi ilə toplanış fevralın 29-dək davam edəcək. Özbəkistan və Türkiyə komandalarının da iştirak etdiyi TMT-nin keçirilməsində əsas məqsəd fiziki hazırlığın yüksəldilməsidir.

Qeyd edək ki, toplanış martın 19-dan 22-dək Macarıstanın paytaxtı Budapeştdə təşkil olunacaq Avropa olimpiya təsnifatına hazırlıqdır.