Vasif Talıbovun komandası Türkiyəyə yollandı

Olimpiya lisenziya turnirinə hazırlaşan qadın voleybol millimiz paytaxtda təlim-məşqi başa vurub bu gün Türkiyəyə yola düşüb. Allsport.az saytı xəbər verir ki, Vasif Talıbovun komandası toplanışın növbəti mərhələsini Türkiyə və Polşada keçəcək.

Yığmamız qonşu ölkədə yoxlama matçında da qüvvəsini sınayacaq. Voleybolçularımızın rəqibi “Fənərbağça” və “Türk Hava Yolları” klubları olacaq. Bundan sonra Polşaya yollanacaq milli oradakı hazırlıq çərçivəsində yerli yığma ilə üz-üzə gələcək.

Xatırladaq ki, Tokio-2020 üçün Avropa təsnifat turniri gələn il yanvarın 7-12-də Niderlandın Apeldorn şəhərində olacaq. “A” qrupunda yer alan Azərbaycan millisi mübarizəyə ev sahibləri ilə başlayacaq. Ardınca Bolqarıstanla qarşılaşacaq yığma son matçda Polşa ilə üz-üzə gələcək. Digər qrupda isə Almaniya, Türkiyə, Xorvatiya və Belçika qüvvəsini sınayacaq. Yarışın qalibi olimpiadaya lisenziya qazanacaq.