Vüqar Həşimovun atası dünyasını dəyişdi

Bu gün beynəlxalq qrossmeyster Vüqar Həşimovun atası, Azərbaycan idmanının inkişafında əvəzsiz xidmətləri olan polkovnik Qasım Həşimov dünyasını dəyişib.
Allsport.az xəbər verir ki, Qasım Murtuza oğlu Həşimov 1949-cu ildə Goranboy rayonunda anadan olub. Uzun illər mərkəzi ordu idman klubunun rəisi vəzifəsində çalışıb. Həmin illərdə klubda müxtəlif idman növlərinin inkişafında böyük xidmətləri olub.
Ailəlikcə idmana böyük sevgisi olan Qasım Həşimov oğlu – şahmat üzrə Avropa çempionu və müxtəlif beynəlxalq turnirlərin qalibi Vüqar Həşimovun Azərbaycanın və dünyanın ən güclü şahmatçılarından biri kimi formalaşmasında misilsiz rol oynayıb. Vüqarın şahmat karyerasında onunla birgə addımlayan Qasım Həşimov oğlunun ilk şahmat müəllimi kimi tanınıb.
2014-cü ildən keçirilən və Vüqar Həşimovun xatirəsinə həsr olunan şahmat üzrə superturnirin təşkilat komitəsinə rəhbərlik edib.
2016-cı ildə rəhbərlik etdiyi Vüqar Həşimov şahmat akademiyasını yaradıb.
Azərbaycanın əməkdar məşqçisi olan Q.Həşimov 2023-cü ildə Azərbaycanda idmanın inkişafında uzunmüddətli səmərəli fəaliyyətinə görə Azərbaycan respublikası prezidentinin fərdi təqaüdünə layiq görülüb.