Vüqar Həşimovun xatirəsi dərin ehtiramla yad edilib

İyulun 24-ü Azərbaycanın məşhur şahmatçısı Vüqar Həşimovun doğum günüdür. Allsport.az saytı xəbər verir ki, mərhumun yaxınları, eləcə də gənclər və idman nazirliyinin nümayəndələri, Azərbaycan şahmat federasiyasının rəhbərliyi, şahmatçının komanda yoldaşları 2-ci Fəxri xiyabanda onun məzarını ziyarət edərək, xatirəsinə dərin ehtiramlarını bildiriblər.

Tədbirdə çıxış edən idman jurnalisti Sənan Şəfizadə görkəmli şahmatçnın qazandığı qələbələrdən, onun insani keyfiyyətlərindən söz açıb. O bildirib ki, hər il V.Həşimovun xatirəsinə həsr olunan beynəlxalq turnirlər keçirilir: “Fikirmcə Vüqar Həşimovun karyerası başa çatmayıb. Onun adına təşkil olunan yarışlar Azərbaycan şahmatının adını daim ucaldır” – deyə vurğulanıb.

AŞF-in Mahir Məmmədov onun adını ölkə idmanına qızıl hərflərlə yazdığını söyləyib: “Vüqar Həşimov kişi şahmatçılardan ibarət milli komandanın ilk Avropa çempionluğunda böyük fədakarlıq nümayiş etdirib. Tarixi çempionluqda onun böyük rolu olub. Vüqarın adı bizə çox əzizdir. Yeniyetmələr, gənclər Vüqar Həşimovun karyerasını, onun oynadığı partiyaları öyrənməlidir. Çünki Vüqarın karyerası onlara çox böyük dəstək olacaq. Vüqarın bizimlə olmaması çox kədərlidi. Onun adı hər zaman Azərbaycan idmanında yaşayacaq. Çünki o adını ölkə idmanı tarixinə qızıl hərflərlə yazıb”.

Gənclər və idman nazirliyinin sektor müdiri Aydın Məmmədov mərhumun ölkə və dünya şahmatının inkişafında böyük işlər gördüyünü deyib. Nazirlik rəsmisi Vüqarın adının daim qəlblərdə yaşadığını qeyd edib.

Vüqar Həşimovun atası Qasım Həşimov göstərilən diqqətə görə təşəkkür edib. Oğlunun irsinin öyrənilməsində qarşıda böyük planların olduğunu bildirib: “Bu gün Vüqarın doğum günündə artıq 8-ci dəfə yeniyetmə və gənclər arasında beynəlxalq turnirə start veriləcək. Vüqarın xatirəsinə Memorial təşkil olunur, onun adı ilə şahmat klubu var. Amma onun partiyaları ümumiyyətlə karyerası dərindən öyrənilməlidi. Vüqarın kompüterində dəyərli təhlillər, partiyalar var. Onların hamısı öyrənilməlidi, xüsusi nəşr kimi çap olunmalıdı”.

Bu gün Vüqar Həşimov Şahmat akademiyasında yeniyetmə və gənclər arasında sayca 8-ci beynəlxalq turnirə start verilib. Yarışda ümumilikdə 144 şahmatçı iştirak edir.