Zeynəb Məmmədyarova: Vətəndə oynamaq bir qədər psixoloji cəhətdən çətindir

42-ci Ümumdünya Şahmat Olimpiadasının 4-cü günündə qadınlardan ibarət əsas millimizin üzvü Zeynəb Məmmədyarova Rumıniya ilə görüşdə birinci lövhədə Korina-İzabela Peptanı məğlub edib. Allsport.az saytı xəbər verir ki, bu olimpiadada ardıcıl 2-ci, ümumilikdə 3-cü qələbəsini qazanan xanım şətrəncçimiz iştirakı ilə mətbuat konfransı keçirilib. Bakı Şahmat Olimpiadasının mətbuat xidməti xəbər verir ki, o, əvvəlcə qələbəsini şərh edib:

“Dünən və bu gün qarşılaşdığım rəqiblərim çox yüksək səviyyəli şahmatçılar idi. Həm Polşa, həm də Rumıniya güclü komandadır. Kapitanımız mənə ehtiyatlı, mümkün qədər risksiz oynamağı tapşırmışdı. Hər iki komanda ilə görüşlərdə heç-heçə bizi qane edirdi. Ehtiyatlı oynasam da, qələbə qazandım. Çox şadam ki, bu qələbə yığmamız üçün mühüm əhəmiyyət kəsb edir. Komanda üçün yarım xal da vacibdir. Meksika ilə görüşdə rəqibim reytinqdə məndən zəif idi. Oyun heç-heçəyə doğru getsə də, risk etdim və uduzum. Həmin yarım xal sonda özünü göstərəcək”.

Məmmədyarova son 1 ildə çox az turnirdə yarışdığını bildirib: “Siyasi fəaliyyətimlə əlaqədar olaraq son 1 ildə yarışlara az qatılıram. Amma vətənpərvərliyimiz özünü göstərir və bu olimpiadada çıxışımız uğurlu alınır. İnanıram ki, sona qədər yaxşı mübarizə aparmağa enerjimiz çatacaq. Qadın şahmatçılarımız əksər hallarda reytinqlərindən daha yaxşı çıxış edirlər. Bu dəfə də elə olacağına inanıram. Düşünürəm ki, ilk “beşliy”ə düşə bilərik”.

Tanınmış qrossmeyster Vətəndə keçirilən yarışlarda məsuliyyətin çox olduğunu vurğulayıb: “2002-ci ildə Bakıda gənclər arasında Avropa çempionatının qalibi oldum. 2003-cü ildə Naxçıvanda dünya çempionatında bürünc medal qazandım, qardaşım Şəhriyar isə çempion oldu. Vətəndə oynamaq bir qədər psixoloji cəhətdən çətindir. Çünki doğma divarlar əlavə məsuliyyətdir. Amma bu məsuliyyət öz işini görür və bizə müvəffəqiyyət gətirir”.