Ədalətli idman günü ilə bağlı seminar

10 Aprel – Ədalətli idman günü ilə əlaqədar milli antidopinq agentliyinin təşkilatçılığı, velosiped idmanı federasiyası və respublika olimpiya velosiped məktəbinin dəstəyi ilə velotrekdə seminar təşkil edilib. Allsport.az saytı xəbər verir ki, tədbirdə velosipedçilərlə yanaşı, digər idman növləri ilə məşğul olan yeniyetmə və gənclər də iştirak edib. AMADA-nın təhsil üzrə meneceri Lalə Hacıyeva idmanda bərabərliyin qorunmasının vacibliyindən, ədalətli qələbə və “təmiz idman”ın əhəmiyyətindən danışaraq AMADA-nın bu istiqamətdə fəaliyyəti haqqında məlumat verib.

Menecer istifadəsi qadağan olunmuş preparatlardan istifadəyə qarşı görülən işlər, idmançıların maarifləndirilməsi istiqamətində həyata keçirilən layihələr və perspektivlərdən də geniş söhbət açıb. Məlumat üçün bildirək ki, WADA 10 aprel tarixini dünyada Ədalətli idman günü elan edib. 2013-cü il aprelin 10-da Cənubi Amerikanın 17 ölkəsinin iştirakı ilə keçirilən WADA-nın təhsil konfransında ədalətli idman təşəbbüsü irəli sürülüb. Cənubi Amerika ölkələrinin təşəbbüsünə daha sonra Avropa, ardınca isə bütün dünya ölkələri qoşulub.

Hər il bu təşəbbüsə müxtəlif ölkələr qoşularaq silsilə tədbirlərə ev sahibliyi edirlər. Bu isə hərəkatın qloballaşmasına imkan yaradır. Hərəkatın sıralarının genişlənməsi dünyada “təmiz idmançılar”ın sayının artmasına, atletlərə rəqibə ədalətlə yanaşmaq və təmiz qələbə hislərini aşılamağa böyük töhfə verir.