Sadıq Sadıqov idmançılar kəndində cüdo millimizlə görüşüb

Cüdo federasiyasının vitse-prezidenti Sadıq Sadıqov yeniyetmələrin Avropa olimpiya festivalında iştirak edən cüdoçular və onların məşqçiləri ilə görüşüb. Allsport.az saytı xəbər verir ki, idmançılar kəndində baş tutan görüşdə əvvəlcə həm oğlanlardan, həm də qızlardan ibarət milli komandanın məşqçiləri nüfuzlu yarışa hazırlıq barədə məlumat veriblər.

Onlar respublikamızda və müxtəlif ölkələrdə yüksək səviyyədə təlim-məşq toplanışları keçdiklərini və ayrı-ayrı turnirlərdə medallar qazandıqlarını diqqətə çatdırıblar. Mütəxəssislər Olimpiya Festivalında layiqli nəticələr göstərmək üçün əllərindən gələni edəcəklərini vurğulayıblar. Öz növbəsində, Sadıq Sadıqov dövlət səviyyəsində idmana, o cümlədən, cüdoya göstərilən qayğını xüsusi vurğulayıb.

ACF-in vitse-prezidenti federasiya rəhbərliyi adından yeniyetmə cüdoçulara uğurlar arzulayıb. Qeyd edək ki, EYOF-da cüdo yarışı 24-27 iyulda Heydər Əliyev adına arenada olacaq. Azərbaycanı bu mötəbər yarışda 8 oğlan və 4 qız cüdoçu təmsil edəcək.