Voleybolçularımız qitə çempionatına hansı komandalarla hazırlaşır?

Qadın voleybol millimiz Avropa çempionatına hazırlığı Bakıda davam etdirir. Allsport.az saytı xəbər verir ki, hazırlıq planına uyğun olaraq yığmamız iyulun 26-na kimi paytaxtda təlim-məşqlərlə bərabər, bir neçə yoxlama görüşü də keçirəcək.

Rəqib Avropa çempionatının iştirakçıları olacaq Belarus və Macarıstan milliləridir. Hər 2 komanda artıq Bakıdadır və bu gün AVF-nin idman zalında ilk məşqinə çıxıb.

Yoxlama oyunları Azərbaycan Voleybol Federasiyasının idman zalında və Fövqəladə Hallar Nazirliyinin İdman-Sağlamlıq Kompleksində keçiriləcək.

21 iyul – 16:30. Azərbaycan –Macarıstan (FHN)
22 iyul – 16:30. Azərbaycan – Belarus (FHN)
23 iyul – 16:30. Azərbaycan – Macarıstan (AVF)
25 iyul – 10:30. Azərbaycan – Belarus (AVF)