FİG-in kollokviumu başladı

Aprelin 2-də Bakıda FİG “Gimnastika hamı üçün” kollokviumunun açılış mərasimi keçirilib. Allsport.az xəəbr verir ki, Azərbaycan gimnastika federasiyasının təşkilatçılığı, YUNESKO-nun himayədarlığı altında baş tutan tədbirdə beynəlxalq ekspertlər, məşqçilər və gimnastika həvəskarları bir araya gələrək təcrübə mübadiləsi aparacaq, müasir inkişaf strategiyalarını müzakirə edəcəklər.

Tədbir idmanın cəmiyyətə inteqrasiyası, sağlam həyat tərzinin təbliği və gimnastikanın daha geniş auditoriya üçün əlçatan olması kimi mövzulara toxunacaq. 39 ölkədən 52 nümayəndənin iştirak etdiyi tədbir bu növ üzrə ölkədə keçirilən ilk kollokviumdur.

Açılış mərasimində gənclər və idman naziri Fərid Qayıbov, beynəlxalq gimnastika federasiyasının (FİG) “Gimnastika hamı üçün” komitəsinin prezidenti Roqerio Valerio, YUNESKO üzrə Azərbaycan Respublikasının milli komissiyasının baş katibi Seymur Fətəliyev, Azərbaycan gimnastika federasiyasının baş katibi Fatimə Şəfizadə çıxış ediblər.

Kollokviuma aprelin 4-də yekun vurulacaq.