Gənclər və İdman Nazirliyində cüdoçularımızın “Böyük dəbilqə”də çıxışı yüksək qiymətləndirilib

Birləşmiş Ərəb Əmirliklərinin paytaxtı Əbu-Dabidə keçirilmiş “Böyük dəbilqə” turnirində medallar qazanan Azərbaycan cüdoçularının iştirakı ilə Gənclər və İdman Nazirliyində mətbuat konfransı keçirilib. Allsport.az saytı xəbər verir ki, nazirin müavini İsmayıl İsmayılov mötəbər yariışda əldə olunan 1 qızıl, 1 gümüş və 1 bürünc medalı yüksək nailiyyət hesab edib. O, bu münasibətlə əməyi olan hər kəsi təbrik edib. Cüdonun Azərbaycanda populyar növ olduğunu bildirən nazirlik rəsmisi Avropa və dünya çempionatları, eləcə də Yay Olimpiya Oyunlarında yüksək nailiyyətlərin qazanıldığını xatırladıb.

O, son olaraq, Rio-2016-da cüdoçuların 2 gümüş medal əldə etdiklərini xatırladaraq, bunu ölkədə idmana, o cümlədən cüdoya göstərilən qayğının real nümunəsi adlandırıb. Nazirlik rəsmisi hazırda cüdonun inkişafı, kütləviliyə nail olunması istiqamətində addımların atıldığını, bölgələrdə müxtəlif yaş qrupları üzrə yarışların keçirildiyini dilə gətirib. İsmayıl İsmayılov cüdoçulara gələcək yarışlarda uğurlar arzulayıb.

Azərbaycan Cüdo Federasiyasının baş katibi Elmar Babanlı tədbirin təşkilinə görə nazirliyə minnətdarlığını bildirib. O, “Böyük dəbilqə”də 34 ölkədən 155 cüdoçunun mübarizə apardığını və bir dəst medalı yüksək nailiyyət saydıqlarını vurğulayıb. Federasiya rəsmisi ilin sonunadək daha bir neçə tədbirə qatılacaqlarını, gələn ildən isə Hakimlərin Seminarı və “Böyük dəbilqə”nin Bakıda təşkil olunacağını vurğulayıb. O, Beynəlxalq Cüdo Federasiyasının 2018-ci il dünya çempionatının Azərbaycan paytaxtında keçiriləcəyini xatırladıb.

“Bu, olimpiadadan sonra ilk yarışımız idi. Biz də məşqçilərimizin verdikləri tapşırıqları yerinə yetirdik”. Bunu Birləşmiş Ərəb Əmirliklərinin paytaxtı Abu-Dabidə keçirilmiş “Böyük Dəbilqə” turnirində qızıl medal qazanmış Azərbaycan cüdoçusu Elxan Məmmədov deyib. 100 kq çəki dərəcəsində çıxış edən təcrübəli idmançı qazanılan nailiyyətdə məşqçilər heyəti ilə yanaşı, Azərbaycan Cüdo Federasiyasının böyük rolunun olduğunu vurğulayıb.

Sonra “Böyük Dəbilqə” yarışında gümüş medal qazanan Rüstəm Orucov və bürünc medalın sahibi Tural Səfquliyev jurnalistləri maraqlandıran suallara cavab verib.