Olqa Kiseloviçova: “AGF bu cür tədbirləri yaxşı keçirir”

Beynəlxalq gimnastika federasiyası akademiyasının aerobika gimnastikası üzrə ikinci səviyyəyə aid məşqçilik kursları yüksək səviyyədə təşkil olunub. Allsport.az xəbər verir ki, federasiyanın eksperti, beynəlxalq dərəcəli hakim, Avropa gimnastika ittifaqının aerobika gimnastikası üzrə texniki komitəsinin üzvü Olqa Kiseloviçova bu barədə danışıb:

“Bu kurslar Bakıda ikinci dəfədir keçirilir. Ötən il biz birinci səviyyəli kursları təşkil etdik və həmin kurslardan uğurla keçən iştirakçılar indi ikinci mərhələdə iştirak edirlər. Kurslarda 6 ölkədən – Azərbaycan, Argentina, Meksika, İran, Moldova və Ukraynadan 19 məşqçi iştirak edir. Şadam ki, kurslar yenidən Bakıda keçirilir. Çünki Azərbaycan gimnsatika federasiyası iş üçün gözəl şərait yaradır və bu cür tədbirləri yaxşı təşkil edir”.

Kiseloviçova Azərbaycanın aerobika gimnastlarının hazırlıq səviyyəsini yüksək qiymətləndirərək bildirib: “Bu ilin mayında Bakıda aerobika gimnastikası üzrə 11-ci Avropa çempionatında texniki komitənin üzvü qismində iştirak etmişəm. Deyə bilərəm ki, AGF idmançılar üçün hər cür şərait yaradıb. Artıq yaxşı nəticələr də əldə olunub. Azərbaycan komandası Avropa çempionatında aerodans proqramında birinci yer tutub”.

Noyabrın 12-dək davam edəcək kurslar Braziliyadan olan ekspert Katia Lemos və aerobika gimnastikası üzrə Azərbaycan yığmasının baş məşqçisi, ekspert Marian Kolev tərəfindən keçirilir.