Nazirlər kabineti gimnastika yarışlarının keçirilməsinə icazə verdi

Milli gimnastika arenası bir illik fasilədən sonra yenidən beynəlxalq yarışlara ev sahibliyi edəcək. Allsport.az xəbər verir ki, nazirlər kabinetinin müvafiq qərarı ilə pandemiya səbəbindən təxirə salınmış və bu ilin may ayında keçirilməsi gözlənilən yarışların əhəmiyyəti nəzərə alınaraq tədbirlərin keçirilməsinə icazə verilib.

Sözügedən yarışlar Tokio-2020 yay olimpiya oyunlarına təsnifat xarakteri daşıyan bədii gimnastika üzrə dünya kuboku (7-9 may), aerobika gimnastikası üzrə yaş qrupları yarışları (21-23 may) və bu növ üzrə dünya çempionatıdır (27-29 may).

Sadalanan turnirlərin ölkəmizdə tətbiq edilən mövcud karantin qaydalarına və sanitar-epidemioloji tələblərə uyğun olaraq və tamaşaçı iştirakı olmadan keçirilməsi planlaşdırılır.