AFFA və Qarabağ dirçəliş fondu arasında memorandum

Bu gün Bakı olimpiya stadionunda Azərbaycan futbol federasiyaları assosiasiyası və Qarabağ dirçəliş fondu arasında əməkdaşlığa dair “Anlaşma memorandumu”nun imzalanması olub. Allsport.az saytı xəbər verir ki, AFFA-nın icraçı vitse-prezidenti Elxan Məmmədov və QDF-in idarə heyətinin sədri Rəhman Hacıyev imzalayıblar.

Razılığa əsasən, AFFA 2022-ci ildə Qətərdə keçiriləcək dünya çempionatının seçmə mərhələsi çərçivəsində Azərbaycan milli komandasının bütün ev oyunlarında bilet satışı zamanı əldə olunan gəlirin 10 (on) faizini QDF-ə ianə edəcək. Bundan başqa, AFFA tərəfindən Azərbaycan milli komandasının oyunları zamanı ictimaiyyət arasında ianəçilik mədəniyyətinin təbliğinə geniş yer veriləcək.

Memorandumun şərtlərinə uyğun olaraq, AFFA-nın dəstəyi ilə keçirilən digər peşəkar və həvəskar futbol turnirləri çərçivəsində də QDF-in təşəbbüsləri dəstəklənəcək. Qarabağ dirçəliş fondu isə öz növbəsində keçirəcəyi tədbirlər zamanı AFFA-nı tərəfdaş kimi qeyd edəcək.