Stolüstü tennisçilərin Azərbaycan birinciliyi başlayıb

Bu gün “Şüa” idman–sağlamlıq kompleksində yeniyetmə və gənc stolüstü tennisçilərin Azərbaycan birinciliyi başlayıb. Allsport.az saytı xəbər verir ki, yarışın açılışını federasiyanın baş katibi Könül Mikayılova və vitse-prezidenti Elmar İslam ediblər.

Kütləviliyi ilə seçilən birinciliyə paytaxt tennisçiləri ilə yanaşı, Gəncə, Sumqayıt, Quba, Qusar, Şabran, Salyan, Şirvan, Şəki, Qax, Balakən, Ağstafa, Gədəbəy, Zərdab və Samuxdan ümumilikdə 150-yə yaxın idmançı qatılıb. Budəfəki yarışlar şəxsi, komanda, qoşa və qarışıq-qoşa proqramında keçirilir.

Federasiyanın baş katibi Könül Mikayılovanın sözünə görə, yarışın təşkilində əsas məqsəd stolüstü tennisin təbliği, kütləviliyinin artırılması, perspektivli idmançıların üzə çıxarılması, ümumilikdə bu idman növünün inkişafına töhfə verməkdir.