Taekvondoçularımızdan 2 qızıl medal 

Millimiz Bosniya və Hersoqovinanın paytaxtı Sarayevoda Balkan kubokunda 2 qızıl medal qazanıb. Allsport.az xəbər verir ki, baş məşqçi Məmməd Abdullayev və böyük məşqçi Sənan Həşimovun rəhbərliyi altında Qaşim Məhəmmədov (63 kq) və Milad Hərçəqani (+87 kq) bütün rəqiblərinə qalib gələrək, fəxri kürsünün ən yüksək pilləsinə qalxıblar. 

Adı ilk çəkilən taekvondoçu mübarizəyə 1/8 finaldan başlayıb. O, ardıcıl olaraq bolqarıstanlı, ispaniyalı və albaniyalı rəqiblərinə qalib gələrək, finala yüksəlib. Qaşim həlledici görüşdə italiyalı idmançı ilə də inamlı döyüşərək, qalib adına yiyələnib. 

2-qat dünya çempionumuz isə Xorvatiya, Şimali Makedoniya və İspaniya taekvondoçularını məğlub edərək, öz çəki dərəcəsində ən güclü olub.