Türkiyə məktəbində “Qarabağ” sevgisi

Ankarada Türkiyə və Azərbaycan məktəbləri arasında dostluq layihəsi çərçivəsində daha bir maraqlı tədbir təşkil edilib. Allsport.az saytı xəbər verir ki, Ankara Mamağ Əli Quşçu ibtidai 2 “D” sinfində oxuyanlar bu dəfə ”Qarabağ” futbol klubunun adına coşqu yaradıblar.

“Şagirdləimizə Bakıdakı dostluq sinfi olan 47 saylı tam orta məktəbin 2C sinfinin valideynləri cox qiymətli hədiyyə göndərmişdilər. Türkiyədə futbol tutkusunun necə olduğunu anlatmağa gərək yoxdu – hamiya bəllidir. Azərbaycanın milli qüruru olan “Qarabağ” futbol komandasının atqıları sinifdə əsl futbol coşqusu yaratdı.

“Qarabağ”ın himni bu coşqunu daha da gücləndirdi. Coşqunun təsirindən bir də gördük ki, şagirdlər “Bir millət-iki dövlət, hər ikisi cümhuriyyət” sözləri üstündə bədahətən rep söyləməyə başladılar. 7 saylı tam orta məktəbin müəlliməsi Aişə xanıma, şagirdlərinə və onların valideynlərinə göndərdikləri hədiyyələr üçün təşəkkür edirik!”, deyə məktəbdən verilən açıqlamada bildirilib.

Qeyd edək ki, bir müddətdir Bakı şəhəri Nərimanov rayonu 47 saylı tam orta məktəbdə Aişə Rüstəmzadənin sinif rəhbəri olduğu 2 “C” sinfinin şagirdləri ilə Ankara Mamağ Əli Quşçu ibtidai 2 “D” sinif şagirdləri arasında “məktub dostluğu layihəsi” gerçəkləşdirilir. Layihə 2018-ci ilin dekabrından başlayıb.

Bu layihə çərçivəsində iki ölkənin adları çəkilən məktəb siniflərinin şagirdləri məktublaşırlar. Uşaqların, onların valideynlərinin və müəllimlərinin razılığı ilə atılan bu ilk addım məktəblilərin qarşılıqlı olaraq qardaş ölkə haqqında məlumatlarını artırır. Bu, həmçinin Azərbaycanda və Türkiyədə qardaş ölkəni yaxından tanıyaraq böyüyən bir nəslin yetişməsinə töhfə vermək baxımından önəmlidir.