Buxara dövlət universiteti ilə memorandum imzalandı

Azərbaycan idman akademiyasında Buxara dövlət universitetinin rektoru professor Obidjon Həmidov ilə görüş keçirilib.

Allsport.az xəbər verir ki, görüş zamanı qonağa Azərbaycan idman akademiyasının fəaliyyətindən bəhs edən film nümayiş etdirilib, daha sonra medialab və idman tibbi tədqiqatları laboratoriyasına baxış keçirilib, Obidjon Həmidov hər iki laboratoriyanın fəaliyyət istiqaməti barədə məlumatlandırılıb.

Buxara dövlət universitetinin rektoruna Azərbaycan idman akademiyasının təlim-tədris fəaliyyəti barədə ətraflı məlumat verilib, tələbə mübadiləsi, ikili diplom proqramları və birgə tədqiqat fəaliyyəti müzakirə olunub.

Görüşün sonunda iki universitet arasında əməkdaşlıq memorandumu imzalanıb. Memorandumu Azərbaycan idman akademiyasının rektoru Fuad Hacıyev və Buxara dövlət universitetinin rektoru professor Obidjon Həmidov imzalayıb.

Memoranduma əsasən, müəllim-tələbə mübadiləsi, yay məktəbləri və konfransların təşkili, elmi-tədqiqatların aparılması və birgə layihələrin həyata keçirilməsi nəzərdə tutulur.