Fərqlənən dövlət qurumları təltif ediliblər

Gənclər və idman nazirliyinin təşkilatçılığı ilə dövlət qurumlarının əməkdaşları arasında müxtəlif idman növləri üzrə ilboyu keçirilmiş yarışlara yekun vurulub. Allsport.az saytı xəbər verir ki, bu gün yarışların ümumi nəticələrinə əsasən fərqlənən dövlət qurumları təltif ediliblər.

GİN-də keçirilən tədbirdə nazir Fərid Qayıbov yarışlarda fəal iştiraka görə bütün dövlət qurumlarına təşəkkür edib və ilk üç yeri tutan qurumlara xüsusi kubokları təqdim edib. Fövqəladə hallar nazirliyi birinci yeri tutub. Dövlət neft şirkəti ikinci, daxili işlər nazirliyi isə üçüncü yerdə qərarlaşıblar.

Dövlət qurumlarının əməkdaşları il ərzində 19 idman növündə – minifutbol, üzgüçülük, bilyard, stolüstü tennis, voleybol, nərd, atletika, idman dırmanması, basketbol, qolf, şahmat, avarçəkmə, kamandan oxatma, badminton, atıcılıq, nərd, padel, çimərlik voleybolu, velosiped idman növləri üzrə 28 turnirdə qüvvələrini sınayıblar.