Londonda boksçularımızın çıxış etdiyi Avropa olimpiya seçmə turniri ümumən dayandırıldı

Londonda keçirilən boks üzrə Avropa olimpiya təsnifat turniri dayandırılıb. Allsport.az xəbər verir ki, bu barədə qərarı beynəlxalq olimpiya komitəsi verib.

Qurum martın 14-də start götürən yarışı may ayına qədər təxirə salıb. Buna koronavirus pandemiyasının yayılma təhlükəsi səbəb olub.

Bu səbəbdən də öncə martın 24-dək davam etməli olan turnirin azarkeşlərsiz keçirilməsi barədə qərar verilmişdi. Lakin sonradan BOK turniri dayandırmağı məqsədəuyğun sayıb.

BOK-un bəyanatında bildirilir ki, Tokio-2020-yə lisenziyaların sahiblərini tapması işçi qrupun səlahiyyətində olacaq: “İşçi qrup olimpiadaya qalan lisenziyaların may-iyunda bölüşdürülməsi üçün gündəlik olaraq vəziyyəti qiymətləndirəcək. Qrupun prioriteti idmançıların oyunlara vəsiqəni idman prinsipləri ilə qazanmasıdır. Biz bütün maraqlı tərəfləri informasiya olan kimi onunla təchiz edəcəyik. BOK 2020-ci il olimpiya oyunlarının Tokioda uğurla keçirilməsi ideyasına sadiqdir”.

Azərbaycan yığması yarışa 11 boksçu (8 kişi, 3 qadın) ilə qatılmışdı.