“Mübarizlər” komandası 1-ci olub

Rəqabət və həyəcan dolu anlarla yadda qalan “Pubq Mobayl” oyunu üzrə “Red Bull MEO- 2024” finalında “MİB Esports” (“Mübarizlər”) komandası üstünlük nümayiş etdirərək, 5000 AZN pul mükafatını qazanıb. Allsport.az saytı xəbər verir ki, qalib 86 xal toplayıb.

“ONYX Esports” komandası 60 xalla 2-ci, “AGS Esports” 53 xalla 3-cü olub. Turnirin əsas tərəfdaşı “Xiaomi”, fərqlənənlərə xüsusi hədiyyələr təqdim edib.

Qalib heyətin kapitanı Ümid Orucov yarışdan sonra qələbə sevincini bölüşüb: “Günlərimizin dörddə birini oyuna sərf edərək, müxtəlif “Mini Cup” və digər turnirlərdə təcrübə qazandıq. Topladığımız təcrübə və komanda olaraq göstərdiyimiz birlik bizə qələbə gətirdi.

Rəqabət qabiliyyətimizi və səylərimizi ortaya qoyaraq turnirin qalibi olduq. “Mübarizlər” komandası adından bütün təşkilatçılara dərin təşəkkürümüzü bildiririk. Belə tədbirlərin mütəmadi olaraq keçirilməsini arzu edirik”.