Vüqar Nadirov: “Hazırkı durumum ürəyimcə deyil”

“Qəbələ”nin əsas komandasında rəsmi debütünü gözləyən futbolçulardan biri də Vüqar Nadirovdur. Allsport.az xəbər verir ki, “Qəbələ”yə Ruslan Abışovla eyni vaxtda keçsə də, Avropa Liqası matçlarına sifariş olunmadığından, yalnız daxili yarışlarda oynaya bilər.

Ancaq Ruslandan fərqli olaraq Vüqar hələ ki, çempionat matçlarını kənardan izləyir. Adı matçların protokoluna daxil edilmədiyindən, ehtiyat oyunçular skamyasında da yer almır. Nadirov klubun qəzetinə açıqlamasında peşəkar futbolçu kimi əsas işinin məşq edib, şansını gözləmək olduğunu bildirib: “Mənə nə vaxt meydan verilsə, etimadı doğrultmağa çalışacağam. Məşqlərdə öz üzərimdə çalışıram. Ancaq əlbəttə, oynamadığıma görə hazırkı durumum ürəyimcə deyil. Həmişə oynayan futbolçu olmuşam. Ötən mövsümün sonunda “Xəzər Lənkəran”a böyük ümidlərlə getdim. Ancaq FİFA-nın məlum qadağasına görə meydana çıxa bilmədim. “Qəbələ”yə keçəndə bir müddət sonra oynayacağımı düşünürdüm. Ancaq gözlədiyim kimi olmadı. Hər dəfə adımın protokola daxil edilmədiyini eşidəndə, pis oluram”.

Lakin təcrübəli futbolçu ruhdan düşmür və Roman Qriqorçukun ona şans verəcəyi anı gözləyir: “Mən də komandama kömək etmək istəyirəm. Ancaq hazırda bu imkana malik deyiləm. Qriqorçuk hələ hazır olmadığımı deyir. Mən həmişə oynamağa hazıram. Əvvəlki formamı yığmaq üçün mənə uzun müddət lazım deyil. Düşünürəm ki, 2 matçda oynasam, özümə gələrəm. Demirəm ki, 90 dəqiqə oynayım. Münasib rəqiblərə qarşı 5-10 dəqiqə oynasam, hazırlığım yavaş-yavaş qaydasına düşər”.

Son vaxtlar milli komandamıza da cəlb olunmayan Nadirovun “Qəbələ”də debütü əvəzedici heyətdə olub. Hücumçu qırmızı-qara formada qol hesabını bu komandada açıb: “Əvəzedici heyətdə çıxış etməklə oyun praktikası qazanıram. “Qəbələ”ylə dekabrın sonunadək müqaviləm var. Qalan 2 ayda əsas komandada oynasam, özümü göstərib, qala bilərəm. Ancaq əks təqdirdə çətin olacaq”.

Vüqar “qırmızı-qara”ların çıxışı haqda da fikirlərini söyləyib: “Komandada yorğunluq var. Bu, “Zirə” ilə oyunda da hiss olunurdu. Ola bilər, Avropa Liqasından sonra çempionata tam köklənə bilməmək də öz təsirini göstərir”.