Çində 1-ci mərhələ başa çatdı

Azərbaycanın kontinental velosiped komandası “Synergy Baku Cycling Project” bu gün Çində start götürən sayca 14-cü “Tour de Qinghai Lake” yürüşündə iştirak edir. Allsport.az xəbər verir ki, Beynəlxalq Velosipedçilər İttifaqının 13 mərhələdən ibarət 2-ci kateqoriyalı yarışında 23 komanda iştirak edir ki, onların da içərisində 1 Dünya Turu, 3 Pro-kontinental və 19 kontinental klub var.

Nüfuzlu yarışda “Synergy Baku” 7 velosipedçi ilə təmsil olunur. Sinin şəhərində təşkil olunan ilk dairəvi mərhələdə iştirakçılar şəhər küçələri ilə 121 km məsafə qət ediblər. Komanda üzvlərimizdən ən yüksək göstərici Yannis Tamuridisə məxsusdur – o, finişi mərhələ qalibi, Sloveniyanın “Adria Mobil” komandasının üzvü Marko Kumpla eyni vaxtda keçsə də, fotofinişə əsasən 6-cı olub. Həmin pelotonun içərisində olan Maksim Averin 12-ci, Aleksandr Surutkoviç isə 14-cü nəticə göstərib.

Sabah iştirakçılar Duobadan Datonqa qədər olan 188 km məsafəni qət etməlidirlər. “Tour de Qinghai Lake” yürüşünə iyulun 18-də yekun vurulacaq.