Çingiz Hüzeynzadə: Velosiped idmanında ixtisaslı kadrlara böyük ehtiyac var

Milli Olimpiya Komitəsi, Beynəlxalq Olimpiya Komitəsinin Olimpiya Həmrəyliyi Fondu, Beynəlxalq Velosipedçilər İttifaqı və Azərbaycan Velosiped İdmanı Federasiyasının dəstəyi ilə Respublika Velotrekində “Məşqçilər üçün texniki təlim kursları” başa çatıb. Allsport.az saytı xəbər verir ki, bu gün kursu uğurla başa vurmuş iştirakçılara sertifikatlar təqdim edilib. 18-25 iyulda keçirilən təlimin iştirakçılarına sertifikatları MOK-un Çingiz Hüseynzadə və AVİF-in vitse-prezidentləri Sahib Ələkbərov təqdim ediblər.

Layihənin əsas məqsədi beynəlxalq standartlara cavab verən məşqçilərin hazırlanması, onların nəzəri və praktiki biliklərinin genişləndirilməsidir. Təlim nəzəri və praktiki məşğələlərdən ibarət olub. Tədbirin sonunda mətbuat nümayəndələrinin suallarını cavablandıran MOK-un vitse-prezidenti Çingiz Hüzeynzadə peşəkar kadrların hazırlanması baxımından bu cür seminarların əhəmiyyətini yüksək qiymətləndirib:

“Velosiped idmanı Azərbaycanda günü-gündən inkişaf edir və bu baxımdan ixtisaslı kadrlara böyük ehtiyac var. Respublika Velotrekində yaradılan şəraitə söz ola bilməz. Bu isə bizə onu deməyə əsas verir ki, qarşıdakı illərdə Azərbaycan velosipedi daha da inkişaf edəcək. Biz isə öz növbəmizdə idmançı və məşqçilərin bilik və bacarıqlarının artırılması üçün bu cür tədbirləri davamlı olaraq təşkil edəcəyik”.