• Ça. İyl 5th, 2022

Şəfəq Hüseynli milli antidopinq təşkilatları institutunun qapalı iclasında çıxış edib

İyn 20, 2022

İsveçrənin Lozanna şəhərində illik qlobal tədbirlər çərçivəsində milli antidopinq agentliyi ikitərəfli görüşlər keçirib və Azərbaycanın dopinqlə mübarizə sahəsində mövcud təcrübəsini bölüşüb. Allsport.az saytı xəbər verir ki, milli antidopinq təşkilatları institutunun (iNADO) qapalı toplantısında AMADA-nın direktoru Şəfəq Hüseynli çıxış edib.

O, idmançı hüquqlarının qorunması antidopinq sahəsinin daim aktual məsələlərindən biri olduğunu deyib. Qeyd edib ki, idmançı hüquqlarının qorunması ilə bağlı həyata keçirdiyi beynəlxalq layihə bu sahədəki vəziyyəti ətraflı təhlil etməyə imkan verib. Layihənin nəticələri göstərdi ki, antidopinq icraatları zamanı idmançı hüquqlarının qorunması ilə bağlı bir sıra təkmilləşdirmələrə ehtiyac var.

Şəfəq Hüseynli Azərbaycan təcrübəsini bölüşərək bildirib ki, AMADA idmançıların pulsuz hüquqi yardımla təmin edilməsi layihəsini artıq 2019-cu ildən həyata keçirir. Lakin hazırda dünya üzrə milli antidopinq qurumlarının təxminən 80 faizində pulsuz hüquqi yardımla bağlı proqram mövcud deyil. Şəfəq Hüseynli AMADA-nın digər milli antidopinq təşkilatları ilə öz təcrübəsini bölüşməyə hazır olduğunu vurğulayaraq bu istiqamətdə əhəmiyyətli addımların atılması zərurətini qeyd edib.

Həmçinin, AMADA-nın dopinq vasitələrinin qanunsuz dövriyyəsi ilə mübarizə sahəsində əlaqədar dövlət qurumları ilə əməkdaşlıq təcrübəsi diqqət mərkəzində olub. Belə ki, Şəfəq Hüseynli bildirib ki, AMADA bu istiqamətdə hüquq-mühafizə orqanları və digər aidiyyəti dövlət qurumları ilə sıx əməkdaşlıq edir və effektiv iş mexanizmi qurub. Qurumlar arasında imzalanan memorandumlarla isə bu əməkdaşlığın hüquqi bazası formalaşdırılıb. Xüsusi ilə gömrük orqanları ilə əməkdaşlıq formatı və görülən birgə işlər ölkələrin milli antidopinq təşkilatlarının marağına səbəb olub. Bir çox təşkilatlar bu təcrübədən istifadə etmək istədiklərini bildiriblər.

Elə bu təcrübənin nəticəsidir ki, Azərbaycan və Avstraliya milli antidopinq qurumları arasında birgə layihəyə başlanılıb. Hər iki dövlətin antidopinq qurumları gömrük orqanlarının nümayəndələri ilə birgə dopinq vasitələrinin dövriyyəsinin qarşısının alınması istiqamətində iş mexanizmi üzrə qaydalar hazırlamağı qərarlaşdırıb. Sözügedən qaydalar bütün dünyada antidopinq təşkilatları və gömrük orqanları ilə bölüşüləcək. Şəfəq Hüseynli dopinq vasitələrinin qanunsuz dövriyyəsi ilə mübarizəni daha da gücləndirmək üçün ümumdünya anti dopinq agentliyinin və ümumdünya gömrük təşkilatının əməkdaşlığı genişləndirilməsini təklif edib. Bu, dünyada milli antidopinq qurumları ilə yerli gömrük orqanları arasında əməkdaşlığa da öz təsirini göstərəcək.

Həmçinin, tədbirlər çərçivəsində AMADA-nın direktoru bir sıra ölkələrin milli antidopinq təşkilatlarının rəhbərləri ilə ikitərəfli görüşlər keçirib və bu zaman fikir və təcrübə mübadiləsi aparılıb. Görüşlərdə antidopinq sahəsində gender bərabərliyi mövzusu xüsusi diqqət mərkəzində olub. Şəfəq Hüseynli bu istiqamətdə həyata keçirdiyi beynəlxalq layihə və sədrlik etdiyi Gender Bərabərliyi Komitəsinin fəaliyyəti ilə bağlı məlumat verib. Bir çox ölkələr layihəni dəstəklədiklərini və iştirak etməkdə maraqlı olduqlarını bildiriblər.

Həmçinin, iNADO və ÜADA-nın panellərdə davam edən müzakirələrdə hazırda antidopinq sahəsi üçün mühüm əhəmiyyət kəsb edən, o cümlədən ÜADA-da idarəçilik islahatları, milli antidopinq qurumların əməliyyat müstəqilliyi və onların ÜADA-nın ali qurumu olan təsisçilər şurasında təmsil olunması, struktur dəyişiklikləri və digər aktual məsələlər müzakirə olunub.

AllEscortAllEscort