Dünya və Avropa çempionu Bakıya gəlir

Gələn ilin mayın 29-da Bakı olimpiya stadionunda keçiriləcək Avropa liqasının finalına hazırlıq kampaniyası çərçivəsində dünya və Avropa çempionu, karyerası ərzində bir sıra məşhur klublarda çıxış etmiş fransalı veteran futbolçu Rober Pires Bakıya səfər edəcək.

Allsport.az saytı xəbər verir ki, dekabrın 4-də BOS-da onun iştirakı ilə aşağı yaş qruplarından ibarət komandalarda çıxış edən uşaqlar üçün futbol festivalı keçiriləcək. Festival saat 11:00-da başlayacaq.

Sonra fransalı futbolçu Bakı Ekspo Mərkəzində təşkil olunacaq “Bakutel 2018”- 24-cü Azərbaycan Beynəlxalq Telekommunikasiya, İnnovasiya və Yüksək Texnologiyalar Sərgisində Avropa liqası final-2019 stendinin təqdimatında iştirak edəcək.