Mərakeş millisinin üzvü “Qarabağ”da

“Qarabağ” yeni mövsüm üçün daha bir futbolçunu heyətinə qatıb. Allsport.az xəbər verir ki, “köhlən atlar” Zaqrebin “Dinamo” klubundan Sami Mmaeni icarəyə götürüb. Müqavilə 1 illik nəzərdə tutulub. Müdafiəçi “Qarabağ”da 3 nömrəli forma ilə çıxış edəcək.

Peşəkar karyerasına 2014-cü ildə Belçikanın “Standard” klubunda başlayan Sami 2017-18-ci illərdə icarə əsasında Niderland təmsilçisi “Maastrixt”in formasını geyinib. 2018-21-ci illərdə Belçikanın “Sent-Truden”, 2021-24-cü illərdə Macarıstanın “Ferensvaroş” klubunda çıxış edən müdafiəçi ötən il “Dinamo”ya keçib.

Belçikanın U-19 və U-21 yığmalarında forma geyinmiş Sami 2020-ci ildə debüt etdiyi Mərakeş millisində 10 matç keçirib. O, çempionlar liqasının 2024/25 mövsümünün pley-offunda “Dinamo”nun heyətində “Qarabağ”a qarşı hər iki oyunda 90 dəqiqə meydanda olub.