AFFA premyer liqa klublarını cərimələdi

AFFA intizam komitəsinin iclası keçirilib.

Allsport.az xəbər verir ki, iclasda premyer liqanın XXI turundakı qayda pozuntuları ilə bağlı qərarlar qəbul edilib.

“Kəpəz” – “Sabah” oyununun 63-cü dəqiqəsində qonaqların futbolçusu İqor Noqeyra ikinci sarıdan qırmızı vərəqə aldığı üçün 1 oyun cəzalanıb, klubu 500 manat cərimə edilib (maddə 36.5.

“Şamaxı” “Neftçi” ilə səfər oyununda 5 futbolçusu sarı vərəqə aldığına görə 700 manat cərimə edilib (maddə 37).

“Turan Tovuz” – “Səbail” oyununun 45-ci dəqiqəsində meydan sahiblərinin futbolçusu Kauan Martins rəqibi aşkar qol imkanından məhrum etdiyinə görə birbaşa qırmızı vərəqə aldığı üçün 1 oyun cəzalanıb, klub isə 1000 manat cərimə olunub (maddə 41). Eyni oyunun 45+3-cü dəqiqəsində “Turan Tovuz” klubunun məşqçisi Ruslan Abışov hakimin qərarına etiraz etdiyinə görə birbaşa qırmızı vərəqə aldığı üçün 1 oyun şərti olmaqla 2 oyun cəzalanıb, komandası 1500 manat cərimə edilib. Ona 3 ay sınaq müddəti təyin edilib (maddə 42.3, 32).

“Turan Tovuz” azarkeşləri tərəfindən hakimlərin ünvanına kütləvi şəkildə təhqiramiz ifadələr səsləndirildiyinə görə 1000 manat cərimə edilib (maddə 43.7).

“Araz-Naxçıvan” “Sumqayıt”la səfər oyununda 4 futbolçusu sarı vərəqə aldığına görə 700 manat cərimə edilib (maddə 37).

“Zirə – “Qarabağ” oyunu bitdikdən sonra meydançaya kənar şəxs daxil olduğuna görə meydan sahibi 800 manat cərimə edilib (maddə 51.2).