“Keşlə” “Sabah”a, “Səbail” “Neftçi”yə qarşı

Bu gün Azərbaycan premyer liqasında VI turun daha 2 oyunu keçiriləcək. Allsport.az xəbər verir ki, hər iki qarşılaşma paytaxtda baş tutacaq.
Günün ilk görüşündə autsayderlər üz-üzə gələcəklər. Hərəyə 1 xalla 7-8-ci yerləri bölüşən “Keşlə” və “Sabah” münasibətlərinə “ASK arena”da aydınlıq gətirəcəklər.
Komandalar indiyədək ölkə çempionatında 10 dəfə qarşılaşıblar. Bu oyunların 4-də meydan sahibləri, 1-də qonaqlar qələbə qazanıblar. 4 matçda isə qalib müəyyənləşməyib. Topların nisbəti də S.Qurbanovun baş məşqçi olduğu komandanın xeyrinədir – 12:6. “Sabah” son 9 matçda qələbə qazanmayıb. Son 3 görüş heç-heçə başa çatıb.
Günün son oyununda “Neftçi” “ASCO arena”da “Səbail”in qonağı olacaq. Hazırda flaqman 10 xalla 4-cü, “dənizçilər” isə 6 xalla 6-cı pillədə qərarlaşıb. Bu, komandaların öz aralarındakı 16-cı premyer liqa matçı olacaq. Əvvəlki 15 qarşılaşmada qonaqlar 10, meydan sahibləri 2 qələbə qazanıb. 3 görüş isə heç-heçə yekunlaşıb. “Ağ-qaralar”ın 34 qoluna rəqibi 10 qolla cavab verib.
“Neftçi” ardıcıl 4 oyunda qələbə qazanıb. “Səbail” isə son 8 matçda qalib gələ bilməyib.

Azərbaycan premyer liqası
VI tur
2 oktyabr (şənbə)
17:00. “Keşlə” –“Sabah”
Hakimlər: Rəşad Əhmədov, Rahil Ramazanov, Rəhman İmami, Rauf Allahverdiyev
Hakim-inspektor: Gülağa Cabarov
AFFA nümayəndəsi: Əsgər Əmirəliyev
“ASK arena”
19:15. “Səbail” – “Neftçi”
Hakimlər: Vüqar Həsənli, Pərvin Talıbov, Eyyub İbrahimov, Fərid Hacıyev
Hakim-inspektor: Rövşən Əhmədov
AFFA nümayəndəsi: Mübariz Hüseynov
“ASCO arena”