Millimiz Beynəlxalq Cüdo Federasiyasının bu il üçün medal sıralamasında 8-ci yerdədir

Beynəlxalq Cüdo Federasiyası (IJF) milli komandalar üçün maraqlı medal statistikası dərc edib. Allsport.az saytı xəbər verir ki, Azərbaycan millisi bu göstərisidə 48 medal (13 qızıl, 9 gümüş və 26 bürünc) ilə 8-ci yerdə qərarlaşıb. Yığmamız üçün ilin birinci yarısı daha məhsuldar olub. Vüqar Şirinlinin (60 kq) qitə yarışlarında – Afrika açıq kuboku, Buenos-Ayres və Limada keçirilən Cənubi Amerika kubokuda 3 qızıl medal qazanması bu göstəriciyə öz təsirini göstərib.

Əgər daha böyük uğurlardan bəhs etsək, o zaman Rüstəm Orucovun (73 kq) çıxışını qeyd etmək lazımdır. IJF-in reytinq cədvəlində milli komandamızın üzvü ilk yerdə qərarlaşıb. Gümüş medal qazandığı Rio Olimpiadasına qədər, o, Kazanda keçirilən Avropa çempionatında və Havana “Qran-Pri”sində qızıl medal sevincini yaşayıb. Düsseldorf qran-prisində 2-ci, Qvadalaxaradakı “World Masters” və Bakı “Böyük Dəbilqə”sində isə 3-cü olub.

Bu uğuru təkrarlayan daha bir cüdoçumuz isə mayda “World Masters”ın qalibi olan olimpiya finalçısı Elmar Qasımovdur (100 kq). Orxan Səfərovun (60 kq) qazandığı nəticələr də milli komandamızın reytinqinə öz töhvəsini verib. Dünya reytinqinə isə 48 qızıl, 20 gümüş və 30 bürünc medalla Yaponiya başçılıq edir.