Budapeştdə bürünc medal

Budapeştdə keçirilən güləş üzrə reytinq turniri davam edir.

Allsport.az xəbər verir ki, yarışın üçüncü günündə Azərbaycanın üç güləşçisi mübarizə aparıb.

Qadın güləşində 65 kq çəki dərəcəsində çıxış edən Birgül Soltanova əvvəlcə rumıniyalı Mariya Pantirunu 13:5 hesabı ilə məğlub edib. O, 1/4 finalda amerikalı Riis Larramendiyə 4:6 hesabı ilə uduzsa da, bürünc medal uğrunda görüşdə kanadalı Miki Roubottomu “tuş”la məğlub edərək fəxri kürsünün üçüncü pilləsinə yüksəlib. Bu, Birgülün karyerasında reytinq turnirlərində qazandığı ilk medal olub.

68 kq çəki dərəcəsində mübarizə aparan Nigar Mirzəzadə türkiyəli dünya mükafatçısı və ikiqat Avropa çempionu Nesrin Başa 0:10 hesabı ilə uduzub.

Yunan-Roma güləşində 67 kq-da debüt edən Məhəmməd Şükürzadə isə 1/8 finalda xorvatiyalı Dominik Etlingerə 0:9 hesabı ilə məğlub olub.