AFFA “Səbail”i 2400, “Keşlə”ni 1600 manat cərimələyib

Bu gün AFFA intizam komitəsinin növbəti iclası keçirilib. Allsport.az saytı xəbər verir ki, aparılan müzakirədən sonra Azərbaycan kubokunun 1/4 final mərhələsinin ilk oyunları ilə bağlı qərarlar çıxarılıb:

“Zirə” – “Səbail” matçının 33-cü dəqiqəsində qonaq futbolçu Tome Kitanovski aqressiv davranışa görə birbaşa qırmızı vərəqə alaraq meydandan kənarlaşdırıldığı üçün 3 oyun cəzalanıb, klubu 2400 manat cərimələnib.

“Neftçi” – “Sumqayıt” matçının 88-ci dəqiqəsində “ağ-qaralar”ın futbolçusu Anton Krivotsyuk ikinci sarı vərəqə alaraq meydandan kənarlaşdırıldığı üçün 1 oyun cəzalanıb, klubu 200 manat cərimə olunub. Oyunun 1-ci hissəsi başa çatdıqdan sonra “Sumqayıt”ın məşqiçisi Elnur Çodarov və “Neftçi”nin inzibatçısı Qədir Həsənov texniki zona qaydalarını pozublar. Bu səbəbdən texniki zonadan kənarlaşdırılan şəxslər 1 oyun cəzalanıb, hər iki klub 800 manat cərimə olunub.

“Qarabağ” – “Keşlə” matçı başa çatdıqdan sonra “qırmızılar”ın qapıçısı Kamran Ağayev və klubun müşahidə şurasının sədri Zaur Axundov hakimlər otağına icazəsiz daxil olduqlarına görə klub 1600 manat cərimə olunub.

Həmin kateqoriyadan