- Baxış sayı: 36
- 28 Mart 2024 10:03
- Baxış sayı: 159
- Mart 28, 2024
- 0
Fevralın 28-də Ümumdünya Boks Seriyasının (WSB) X turun matçında Azərbaycanın “Baku Fires” klubu səfərdə Kubanın “Cuba Domaderos” komandası ilə qarşılaşacaq. Boks Federasiyasından verilən məlumata görə, artıq hər 2 komanda heyətini açıqlayıb.
Belə ki, qrupumuzun aşkar favoriti olan Kuba komandasının ən tanınmış boksçusu Sotolonqodur. Yevgeni Romaşkeviçin rəqibi olacaq boksçu 2008-ci ildə Pekin Olimpiadasının bürünc medalını qazandıqdan 4 il sonra Londonda fəxri kürsünün ən yüksək pilləsinə qalxıb. Sotolonqo 2009-cu ildə Milanda keçirilmiş dünya çempionatının da qalibi olub.
60 kq çəki dərəcəsində döyüşəcək Lazaro Alvarez də Kubanın ən güclü boksçularındandır. O, 2011-ci ildə Bakıda, ötən il isə Almatıda dünya çempionu olub. Alvarez 56 kq çəki dərəcəsində London Olimpiadasında 3-cü yerə layiq görülüb. Özbəkistanlı Tocibayevin ona ciddi müqavimət göstərməsi çətin olacaq.
Kubada rinqə çıxanlar arasında Avropa çempionumuz, Olimpiya oyunlarının bürünc mükafatçısı Teymur Məmmədov da olacaq. Onun rəqibi 2011-ci ildə Bakıda dünya çempionatının qızıl medalına layiq görülmüş Xulio Sezar la Kruzdur. Həmin yarışda Məmmədov 91 kq çəki dərəcəsində 2-ci yeri tutmuşdu. Teymur WSB liqasında bir döyüş keçirərək, qalib gəlib.
Komandaların heyətləri:
Cuba Domaderos – Baku Fires
52 kq. Xerardo Servantes – Məhəmməd Abdulhəmidov
60 kq. Lazaro Alvarez – Xurşid Tocibayev
69 kq. Roniel Sotolonqo – Yevgeni Romaşkeviç
81 kq. Xulio Sezar la Kruz – Teymur Məmmədov
+91 kq. Yoandi Toirak – Arslanbek Mahmudov
Kubalılar 8 görüşdən sonra 100 faizlik nəticə ilə B qrupunun vahid lideridir. “Baku Fires” isə 8 görüşdən 17 xal toplayaraq, B qrupunda 3-cü yeri tutur.
Turnir cədvəli:
1. Cuba Domaderos – 24 xal, (8 görüş)
2. Astana Arlans – 19, (9)
3. Baku Fires – 17, (9)
4. Rusiya – 14, (8)
5. Mexico Guerreros – 7, (9)
6. Hussars Poland – 4, (9)
A qrupunda isə İtaliyanın “Dolce Gabbana” komandası 20 xalla vahid liderdir. Ukraynalılar 19 xalla 2-ci yeri tuturlar. Almaniya 11 xalla 3-cü, ABŞ komandası isə 10 xalla 4-cü pillədədir.
Qeyd edək ki, bu həftə B qrupunda daha 2 qarşılaşma baş tutacaq: Mexico Guerreros doğma divarlar arasında Rusiya komandasını qəbul edəcək. “Poland Hussars” isə səfərdə “Astana Arlans”ın qonağı olacaq.