İnfantinoya etirazın önündə dayanan iki qadın funksioner

UEFA-da FİFA prezidenti Canni İnfantinonun dünya çempionatı ilə bağlı planlarına qarşı etirazın əsas simalarının kim olduğu məlum olub.

Allsport.az xəbər verir ki, UEFA-nın iyulun 30-da keçirilən fövqəladə videokonfransında Uels futbol assosiasiyasının nümayəndəsi və UEFA-nın vitse-prezidenti Laura MakAllister, eləcə də Norveç futbol federasiyasının prezidenti Lize Klaveness FİFA turnirlərinin boykot olunması ideyasını ən qəti şəkildə müdafiə edən şəxslər olublar.

150 nəfərin qatıldığı iclasda əvvəlcə FİFA-nın dünya çempionatlarının idarəçiliyini yeni şirkət vasitəsilə özəl investorlara açmaq planı müzakirə edilib. Məhz MakAllister və Klavenessin sərt çıxışlarından sonra UEFA rəhbərliyində etiraz daha ciddi müstəviyə keçib və 2030-cu il dünya çempionatının boykot edilməsi ehtimalı gündəmə gəlib.

UEFA prezidenti Aleksander Çeferin də FİFA-nın son qərarlarından narazılığını gizlətməyib. O, daha əvvəl ABŞ millisinin hücumçusu Folarin Baloqunun cəzasının ləğv edilməsini tənqid etmiş, həmçinin bu səbəbdən 2026-cı il Dünya çempionatının finalına qatılmamışdı.