Jurnalistlərin “Zəfər kuboku”

İdman araşdırmalar mərkəzi 10 illik yubileyi münasibətilə jurnalistlər arasında mini-futbol üzrə “Zəfər kuboku” təşkil edəcək. Allsport.az saytı xəbər verir ki, yarış Azərbaycanın ilk onlayn qanuni mərc saytı “eTopaz”ın baş sponsorluğu ilə keçiriləcək.

Məqsəd İAM-ın və “eTopaz”ın 10 illik yubileyini, 44 günlük 2-ci Vətən müharibəsində qazanılan qələbəni, eləcə də turnir günlərinə təsadüf edəcək 9 May – Faşizm üzərində Qələbə günü, 28 May – Müstəqillik günü, mərhum jurnalist Elnur Əşrəfoğlunun doğum gününü qeyd etmək, jurnalistlər arasında münasibətləri daha da yaxşılaşdırmaq, bu idman növünün təbliği, futbolun kütləvililiyinin artırılması, asudə vaxtlarının səmərəli təşkilinə mənəvi dəstək olmaqdır.

Yarışda yalnız jurnalistlər iştirak edə bilərlər. Komandalar püşkatma yolu ilə “Cəbrayıl”, “Füzuli”, “Zəngilan”, “Qubadlı”, “Laçın”, “Kəlbəcər”, “Ağdam” və “Şuşa” adlanacaq və hər birinə təşkilatçı tərəfindən geyim (köynək və şort) veriləcək. Oyunçuların yalnız həmin formalarla meydana çıxa biləcəklər.

Qalib komandaya “Zəfər kuboku” və 2 000 manat pul mükafatı (hər bir oyunçuya 250 manat), 2-ci yeri tutana isə 1200 manat pul mükafatı (hər bir oyunçuya 150 manat) veriləcək.

Yarış 4 may – 19 iyun tarixlərində keçiriləcək.