Qabriel Batistuta “Fiorentina” – “Qarabağ” oyununu izləyəcək

“Fiorentina”nın əfsanəsi Qabriel Batistuta sentyabrın 29-da Avropa Liqasının qrup mərhələsində “Qarabağ”la oyununu stadiondan izləyəcək. Allsport.az saytı xəbər verir ki, ulduz futbolçuya, eyni zamanda, Florentsiya şəhərinin fəxri vətəndaşlığı veriləcək.

Tədbir “Qarabağ”la matçdan əvvəl “Artemio Franki” stadionunda keçiriləcək. “Batiqol” 1991-2000-ci illərdə “bənövşəyilər”in formasını geyinib. O, bu komandada 269 oyunda 168 qol vurub. Batistuta Argentina millisinin heyətində 54 dəfə fərqlənib.