“Qarabağ”dan rekordlar

Avroliqanın qrup mərhələsinin 3-cü turunda keçirilmiş “Dnepr” (Ukrayna) – “Qarabağ” (Azərbaycan) qarşılaşması ölkə futbolunda bir sıra tarixi nailiyyətlərlə əlamətdar olub. Allsport.az saytı apasport.az-a istinadən xəbər verir ki, Ağdam təmsilçisinin 1:0 hesablı səfər qələbəsi görünməmiş rekordlarımızla nəticələnib. Onlardan bəziləri qrupun qarşıdakı 3 oyununda növbəti dəfə yenilənə də bilər. Bunun üçün “Qarabağ”ın uğurlu çıxışı davam etdirməsi lazımdı.

Qrupda ilk uğur: Bu qələbə ilə “Qarabağ” Azərbaycan futbolunda tarix yazıb – Qurban Qurbanovun rəhbərlik etdiyi kollektiv Avropa liqasının qrup mərhələsində qələbə qazanan ilk klub olub.

Mövsümdə 9 qələbə: “Qarabağ”ın qələbəsi 2014/15 mövsümündə əldə olunan 9-cu uğur oldu. Bununla, klublarımızın avrokuboklarda 22 illik çıxışı ərzində ən yüksək nailiyyət əldə edildi. İndiyədək ən yaxşı nəticə 2013/14 mövsümündəki 8 qələbə sayılırdı.

UEFA reytinqində 3-ü arxada qoyduq: Azərbaycan klubları cari mövsüm UEFA reytinqi üçün 3,125 xal toplayıb. Bu da avrokuboklar tarixində rekordumuz olan 2012/13 mövsümünü arxada qoyur. Həmin vaxt ölkəmiz 3,000-lə kifayətlənmişdi.

Qrupda 4 xal: “Qarabağ” Avropa Liqasının qrupunda ən çox xal toplayan Azərbaycan klubu adını qazanıb. Ağdamlılar 4-ə çatmaqla, 2 il əvvəl 3 xal qazanan “Neftçi”ni keçib.

5 ildə 12: Son 5 mövsümün nəticəsinə əsasən hesablanan reytinqimiz isə 12,000-yə çatıb. Cari mövsümədək ən yüksək nəticəmiz 10,375 idi.