“Qarabağ”ı da Avroliqadan uzaqlaşdırdılar

Bu gün Avropa Liqasında qrup mərhələsinin sonuncu – altıncı turunun oyunları keçirilib. Allsport.az xəbər verir ki, Azərbaycanı qitənin nüfuzuna görə ikinci dərəcəli klub turnirində təmsil edən “Qarabağ” da qrupdakı son oyununa çıxıb.

Ağdam klubu səfərdə Belçika “Anderlext”inin qonağı olub. Qrupdan çıxmaq yolunda Qurban Qurbanovun futbolçuları “Anderlext”ə mütləq qalib gəlməliydilər. Ağdamlıların qrupdan çıxması üçün eyni zamanda “Tottenhem”in “Monako”ya məğlub olmaması da vacib idi. Belə olan halda təmsilçimiz Azərbaycan futbolu tarixində yeni bir səhifə açmış olacaq və avrokubokların pley-offuna vəsiqə qazanacaqdı. Amma təəssüf ki, ağdamlılar hesabı açdıqları görüşdə üstünlüyü tez bir zamanda əldən veriblər və qarşılaşmanı məğlub başa vurublar. Nəticədə, “Qarabağ” da qrupdan çıxa bilməyib.

Təmsilçimizin yer aldığı qrupun digər oyununda İngiltərə “Tottenhem”i evdə “Monako” ilə münasibətlərinə aydınlıq gətirib. Londonda baş tutan görüşdə meydan sahibləri 4:1 hesablı qələbəyə seviniblər.

UEFA Avropa Liqası
“J” qrupu
6-cı tur
10 dekabr

“Anderlext” – “Qarabağ” – 2:1 (2:1)
Qollar: D.Kintana, 26 (0:1). E.Naxar, 28 (1:1). S.Okaka, 31 (2:1).
Sarı vərəqə: S.Armenteros, 35. D.Kintana, 48. R.Almeyda, 51. D.Lukebakio, 70. Mişel, 81.
Baş hakim: Slavko Vinçiç (Sloveniya).
Brüssel. “Konstant Vanden Stok” stadionu.

“Anderlext”: 1. Silvio Proto (k), 3. Olivye Deşaxt, 21. Fabris N`Sakalya, 4. Serin Mbodji, 7. Endi Naxar, 10. Dennis Prat (38. Endi Kavayya, 90+1), 30. Giyom Jiye, 31. Yuri Tilemans, 9. Matias Suares, 93. İmoh Ezekiel (46. Dodi Lukebakio, 66), 99. Stefano Okaka (26. İdrissa Silla, 81).
Ehtiyat oyunçular: 33. Davi Ruf, 14. Bram Neytink, 24. Mixael Heylen, 17. İbrahima Konte.
Baş məşqçi: Besnik Hasi.
“Qarabağ”: 13. İbrahim Şehiç, 5. Maksim Medvedev, 14. Rəşad Sadıqov (k), 18. İlqar Qurbanov, 55. Bədavi Hüseynov, 2. Qara Qarayev (29. Raydell Pupon, 75), 10. Dani Kintana, 20. Riçard Almeyda, 22. Əfran İsmayılov (77. Cavid Tağıyev, 63), 70. Çumbinyo (8. Mişel, 71), 90. Samuel Armenteros.
Ehtiyat oyunçular: 1. Fərhad Vəliyev, 32. Elvin Yunuszadə, 11. Elvin Məmmədov, 91. Coşqun Diniyev.
Baş məşqçi: Qurban Qurbanov.